Chinmayalinga Ashtakam

1

(श्रीरुद्रकृतम्) ब्रह्ममुखामरपूजितलिङ्गं जिह्मगभूषणभूषितलिङ्गम्। सिंहमहामदमर्दनलिङ्गं चित्त सदा भज चिन्मयलिङ्गम्॥

2

कनकधराधरकार्मुकलिङ्गं सनकमुखादिसुसन्नुतलिङ्गम्। दिनकरकोटिसुदीधितिलिङ्गं चित्त सदा भज चिन्मयलिङ्गम्॥

3

अष्टविभूतिदमिष्टदलिङ्गं सृष्टजगत्त्रयरक्षकलिङ्गम्। अष्टमहाभयशिक्षकलिङ्गं चित्त सदा भज चिन्मयलिङ्गम्॥

4

मत्तगजाजिनवेष्टितलिङ्गं दग्धजगत्कृतपञ्चकलिङ्गम्। उत्तमपूरुषवत्सललिङ्गं चित्त सदा भज चिन्मयलिङ्गम्॥

5

अङ्गभवाङ्गसुभङ्गदलिङ्गं तुङ्गजटाभरशोभितलिङ्गम्। मङ्गलदायकमद्भुतलिङ्गं चित्त सदा भज चिन्मयलिङ्गम्॥

6

पङ्कजनेत्रसमर्चितलिङ्गं शङ्करमादिममच्युतलिङ्गम्। सङ्कटदोषनिवर्तकलिङ्गं चित्त सदा भज चिन्मयलिङ्गम्॥

7

अभ्रसभान्तरनर्तनलिङ्गं शुभ्रविभूतिविभूषितलिङ्गम्। शुभ्रहृदम्बुजशोभितलिङ्गं चित्त सदा भज चिन्मयलिङ्गम्॥

8

कुन्दवनान्तरमन्दिरलिङ्गं मन्दहसाननसुन्दरलिङ्गम्। वन्दितभक्तजनावृतलिङ्गं चित्त सदा भज चिन्मयलिङ्गम्॥

9

रुद्रकृताष्टकमद्भुतमेतद्भद्रकरं पठतीह मनुष्यः। इष्टफलं समवाप्य यथेष्टं शिष्टजनोत्तम एव हि स स्यात्॥