Shri Yugalashtakam

1

श्रीमाधवेन्द्रपुरीविरचितम्। वृन्दावनविहाराढ्यौ सच्चिदानन्दविग्रहौ। मणिमण्डपमध्यस्थौ राधाकृष्णौ नमाम्यहम्॥

2

पीतनीलपटौ शान्तौ श्यामगौरकलेवरौ। सदा रासरतौ सत्यौ राधाकृष्णौ नमाम्यहम्॥

3

भावाविष्टौ सदा रम्यौ रासचातुर्यपण्डितौ। मुरलीगानतत्त्वज्ञौ राधाकृष्णौ नमाम्यहम्॥

4

यमुनोपवनावासौ कदम्बवनमन्दिरौ। कल्पद्रुमवनाधीशौ राधाकृष्णौ नमाम्यहम्॥

5

यमुनास्नानसुभगौ गोवर्धनविलासिनौ। दिव्यमन्दारमालाढ्यौ राधाकृष्णौ नमाम्यहम्॥

6

मञ्जीररञ्जितपदौ नासाग्रगजमौक्तिकौ। मधुरस्मेरसुमुखौ राधाकृष्णौ नमाम्यहम्॥

7

अनन्तकोटिब्रह्माण्डे सृष्टिस्थित्यन्तकारिणौ। मोहनौ सर्वलोकानां राधाकृष्णौ नमाम्यहम्॥

8

परस्परसमाविष्टौ परस्परगणप्रियौ। रससागरसम्पन्नौ राधाकृष्णौ नमाम्यहम्॥