Hanuman Chalisa

Doha 1

श्रीगुरु चरन सरोज रज, निज मनु मुकुरु सुधारि। बरनउँ रघुबर बिमल जसु, जो दायकु फल चारि॥

Shri guru charan saroj raj, nij manu mukuru sudhari. Baranau Raghubar bimal jasu, jo dayaku phal chari.

Doha 2

बुद्धिहीन तनु जानिके, सुमिरौं पवन-कुमार। बल बुधि बिद्या देहु मोहिं, हरहु कलेस बिकार॥

Buddhiheen tanu janike, sumirau Pavan-kumar. Bal budhi vidya dehu mohin, harahu kalesh vikar.

1

जय हनुमान ज्ञान गुन सागर। जय कपीस तिहुँ लोक उजागर॥

Jai Hanuman gyan gun sagar. Jai Kapisa tihun lok ujagar.

2

राम दूत अतुलित बल धामा। अंजनि पुत्र पवनसुत नामा॥

Ram doot atulit bal dhama. Anjani putra Pavansut nama.

3

महाबीर बिक्रम बजरंगी। कुमति निवार सुमति के संगी॥

Mahabir bikram Bajrangi. Kumati nivar sumati ke sangi.

4

कंचन बरन बिराज सुबेसा। कानन कुंडल कुंचित केसा॥

Kanchan baran biraj subesa. Kanan kundal kunchit kesa.

5

हाथ बज्र औ ध्वजा बिराजै। काँधे मूँज जनेऊ साजै॥

Hath bajra au dhwaja birajai. Kandhe moonj janeu sajai.

6

शंकर सुवन केसरी नंदन। तेज प्रताप महा जग बंदन॥

Shankar suvan Kesari nandan. Tej pratap maha jag bandan.

7

विद्यावान गुनी अति चातुर। राम काज करिबे को आतुर॥

Vidyavan guni ati chatur. Ram kaj karibe ko atur.

8

प्रभु चरित्र सुनिबे को रसिया। राम लखन सीता मन बसिया॥

Prabhu charitra sunibe ko rasiya. Ram Lakhan Sita man basiya.

9

सूक्ष्म रूप धरि सियहिं दिखावा। बिकट रूप धरि लंक जरावा॥

Sukshma roop dhari Siyahin dikhava. Bikat roop dhari Lank jarava.

10

भीम रूप धरि असुर संहारे। रामचंद्र के काज संवारे॥

Bhim roop dhari asur sanhare. Ramchandra ke kaj sanvare.

11

लाय सजीवन लखन जियाये। श्रीरघुबीर हरषि उर लाये॥

Laye sajivan Lakhan jiyaye. Shri Raghubir harashi ur laye.

12

रघुपति कीन्ही बहुत बड़ाई। तुम मम प्रिय भरतहि सम भाई॥

Raghupati kinhi bahut badai. Tum mam priya Bharatahi sam bhai.

13

सहस बदन तुम्हरो जस गावैं। अस कहि श्रीपति कंठ लगावैं॥

Sahas badan tumharo jas gawain. As kahi Shripati kanth lagawain.

14

सनकादिक ब्रह्मादि मुनीसा। नारद सारद सहित अहीसा॥

Sanakadik Brahmadi munisa. Narad Sarad sahit Ahisa.

15

यम कुबेर दिगपाल जहाँ ते। कबि कोबिद कहि सके कहाँ ते॥

Yam Kuber digpal jahan te. Kabi kobid kahi sake kahan te.

16

तुम उपकार सुग्रीवहिं कीन्हा। राम मिलाय राजपद दीन्हा॥

Tum upkar Sugrivahin kinha. Ram milaye rajapad dinha.

17

तुम्हरो मन्त्र विभीषण माना। लंकेश्वर भए सब जग जाना॥

Tumharo mantra Vibhishan mana. Lankeshwar bhaye sab jag jana.

18

जुग सहस्र जोजन पर भानु। लील्यो ताहि मधुर फल जानू॥

Jug sahasra jojan par bhanu. Lilyo tahi madhur phal janu.

19

प्रभु मुद्रिका मेलि मुख माहीं। जलधि लाँघि गये अचरज नाहीं॥

Prabhu mudrika meli mukh mahin. Jaladhi langhi gaye acharaj nahin.

20

दुर्गम काज जगत के जेते। सुगम अनुग्रह तुम्हरे तेते॥

Durgam kaj jagat ke jete. Sugam anugrah tumhare tete.

21

राम दुआरे तुम रखवारे। होत न आज्ञा बिनु पैसारे॥

Ram duare tum rakhvare. Hot na agya binu paisare.

22

सब सुख लहैं तुम्हारी सरना। तुम रक्षक काहू को डर ना॥

Sab sukh lahain tumhari sarna. Tum rakshak kahu ko dar na.

23

आपन तेज सम्हारो आपै। तीनों लोक हाँक तें काँपै॥

Aapan tej samharo aapai. Tinon lok hank ten kanpai.

24

भूत पिशाच निकट नहिं आवै। महाबीर जब नाम सुनावै॥

Bhoot pishach nikat nahin aavai. Mahabir jab naam sunavai.

25

नासै रोग हरै सब पीरा। जपत निरंतर हनुमत बीरा॥

Nasai rog harai sab pira. Japat nirantar Hanumat bira.

26

संकट तें हनुमान छुड़ावै। मन क्रम बचन ध्यान जो लावै॥

Sankat ten Hanuman chhudavai. Man kram bachan dhyan jo lavai.

27

सब पर राम तपस्वी राजा। तिन के काज सकल तुम साजा॥

Sab par Ram tapasvi raja. Tin ke kaj sakal tum saja.

28

और मनोरथ जो कोइ लावै। सोइ अमित जीवन फल पावै॥

Aur manorath jo koi lavai. Soi amit jivan phal pavai.

29

चारों जुग परताप तुम्हारा। है परसिद्ध जगत उजियारा॥

Charon jug pratap tumhara. Hai prasiddha jagat ujiyara.

30

साधु सन्त के तुम रखवारे। असुर निकन्दन राम दुलारे॥

Sadhu sant ke tum rakhvare. Asur nikandan Ram dulare.

31

अष्ट सिद्धि नौ निधि के दाता। अस बर दीन्ह जानकी माता॥

Ashta siddhi nau nidhi ke data. As bar dinh Janaki mata.

32

राम रसायन तुम्हरे पासा। सदा रहो रघुपति के दासा॥

Ram rasayan tumhare pasa. Sada raho Raghupati ke dasa.

33

तुम्हरे भजन राम को पावै। जनम जनम के दुख बिसरावै॥

Tumhare bhajan Ram ko pavai. Janam janam ke dukh bisravai.

34

अन्त काल रघुबर पुर जाई। जहाँ जन्म हरिभक्त कहाई॥

Ant kal Raghubar pur jai. Jahan janam Hari-bhakt kahai.

35

और देवता चित्त न धरई। हनुमत सेइ सर्व सुख करई॥

Aur devata chitt na dharai. Hanumat sei sarva sukh karai.

36

संकट कटै मिटैं सब पीरा। जो सुमिरै हनुमत बलबीरा॥

Sankat katai mitain sab pira. Jo sumirai Hanumat balbira.

37

जय जय जय हनुमान गोसाईं। कृपा करहु गुरुदेव की नाईं॥

Jai jai jai Hanuman Gosain. Kripa karahu Gurudev ki nain.

38

जो सत बार पाठ कर कोई। छूटहिं बन्दि महा सुख होई॥

Jo sat bar path kar koi. Chhootahin bandi maha sukh hoi.

39

जो यह पढ़ै हनुमान चालीसा। होय सिद्धि साखी गौरीसा॥

Jo yah padhai Hanuman Chalisa. Hoy siddhi sakhi Gaurisa.

40

तुलसीदास सदा हरि चेरा। कीजै नाथ हृदय महँ डेरा॥

Tulsidas sada Hari chera. Kijai Nath hriday mahan dera.

Doha

पवनतनय संकट हरन, मंगल मूरति रूप। राम लखन सीता सहित, हृदय बसहु सुर भूप॥

Pavanatanay sankat haran, mangal murati roop. Ram Lakhan Sita sahit, hriday basahu sur bhoop.