Shri Chidambara Ashtakam 1

1

ब्रह्ममुखामरवन्दितलिङ्गं जन्मजरामरणान्तकलिङ्गम्। कर्मनिवारणकौशललिङ्गं तन्मृदु पातु चिदंबरलिङ्गम्॥

2

कल्पकमूलप्रतिष्ठितलिङ्गं दर्पकनाशयुधिष्ठिरलिङ्गम्। कुप्रकृतिप्रकरान्तकलिङ्गं तन्मृदु पातु चिदंबरलिङ्गम्॥

3

स्कन्दगणेश्वरकल्पितलिङ्गं किन्नरचारणगायकलिङ्गम्। पन्नगभूषणपावनलिङ्गं तन्मृदु पातु चिदंबरलिङ्गम्॥

4

सांबसदाशिवशङ्करलिङ्गं काम्यवरप्रदकोमललिङ्गम्। साम्यविहीनसुमानसलिङ्गं तन्मृदु पातु चिदंबरलिङ्गम्॥

5

कलिमलकाननपावकलिङ्गं सलिलतरंगविभूषणलिङ्गम्। पलितपतंगप्रदीपकलिङ्गं तन्मृदु पातु चिदंबरलिङ्गम्॥

6

अष्टतनुप्रतिभासुरलिङ्गं विष्टपनाथविकस्वरलिङ्गम्। शिष्टजनावनशीलितलिङ्गं तन्मृदु पातु चिदंबरलिङ्गम्॥

7

अन्तकमर्दनबन्धुरलिङ्गं कृन्तितकामकलेवरलिङ्गम्। जन्तुहृदिस्थितजीवकलिङ्गं तन्मृदु पातु चिदंबरलिङ्गम्॥

8

पुष्टधियस्सु चिदंबरलिङ्गं दृष्टमिदं मनसानुपठन्ति। अष्टकमेतदवाङ्मनसीयं अष्टतनुं प्रति यान्ति नरास्ते॥