Shri Nanda NandanaShTakam

1

सुचारुवक्त्रमण्डलं सुकर्णरत्नकुण्डलम्। सुचर्चिताङ्गचन्दनं नमामि नन्दनन्दनम्॥

2

सुदीर्घनेत्रपङ्कजं शिखीशिखण्डमूर्धजम्। अनन्तकोटिमोहनं नमामि नन्दनन्दनम्॥

3

सुनासिकाग्रमौक्तिकं स्वच्छदन्तपङ्क्तिकम्। नवाम्बुदाङ्गचिक्कणं नमामि नन्दनन्दनम्॥

4

करेणवेणुरञ्जितं गतिः करीन्द्रगञ्जितम्। दुकूलपीतशोभनं नमामि नन्दनन्दनम्॥

5

त्रिभङ्गदेहसुन्दरं नखद्युतिः सुधाकरम्। अमूल्यरत्नभूषणं नमामि नन्दनन्दनम्॥

6

सुगन्ध अङ्गसौरभं उरो विराजि कौस्तुभम्। स्फुरत् श्रीवत्सलाञ्छनं नमामि नन्दनन्दनम्॥

7

वृन्दावनसुनागरं विलासानुगवाससम्। सुरेन्द्रगर्वमोचनं नमामि नन्दनन्दनम्॥

8

व्रजाङ्गनासुनायकं सदा सुखप्रदायकम्। जगन्मनःप्रलोभनं नमामि नन्दनन्दनम्॥

9

श्रीनन्दनन्दनाष्टकं पठेद्यः श्रद्धयान्वितः। तरेद्भवाब्धिदुस्तरं लभेत्तदङ्घ्रियुक्तकम्॥