Gurvashtakam

1

वन्देऽहं सच्चिदानन्दं भेदातीतं जगद्गुरुम्। नित्यं पूर्णं निराकारं निर्गुणं सर्वसंस्थितम्॥

2

परात्परतरं ध्येयं नित्यमानन्द-कारणम्। हृदयाकाश-मध्यस्थं शुद्ध-स्फटिक-सन्निभम्॥

3

अखण्ड-मण्डलाकारं व्याप्तं येन चराऽचरम्। तत्पदं दर्शितं येन तस्मै श्रीगुरवे नमः॥

4

गुरुर्ब्रह्मा गुरुर्विष्णुर्गुरुर्देवो महेश्वरः। गुरुरेव परं ब्रह्म तस्मै श्रीगुरवे नमः॥

5

अज्ञान-तिमिरान्धस्य ज्ञानाञ्जन-शलाकया। चक्षुरुन्मीलितं येन तस्मै श्रीगुरवे नमः॥

6

चैतन्यं शाश्वतं शान्तं व्योमातीतं निरञ्जनम्। विन्दु-नाद-कलातीतं तस्मै श्रीगुरवे नमः॥

7

अनेक-जन्म -संप्राप्त -कर्मबन्ध -विदाहिने। आज्ञज्ञान-प्रदानेन तस्मै श्रीगुरवे नमः॥

8

शिष्याणां मोक्षदानाय लीलया देहधारिणे। सदेहेऽपि विदेहाय तस्मै श्रीगुरवे नमः॥

9

गुर्वष्टकमिदं स्तोत्रं सायं-प्रातस्तु यः पठेत्। स विमुक्तो भवेल्लोकात् सद्गुरो कृपया ध्रुवम्॥