Shri Mahadeva Ashtakam

1

मोक्षलक्ष्मीगृहद्वारकवाटोद्धाटनध्वनिः। महादेव महादेव महादेवेत्ययं ध्वनिः॥

2

वैवस्वतमहाराजमौलिसङ्कुट्टनध्वनिः। महादेव महादेव महादेवेत्ययं ध्वनिः॥

3

कैलासनगरद्वारमहाघण्टारवध्वनिः। महादेव महादेव महादेवेत्ययं ध्वनिः॥

4

महापातकमत्तेभत्रासकण्ठीरवध्वनिः। महादेव महादेव महादेवेत्ययं ध्वनिः॥

5

महेश्वरमहोक्षस्य घण्टाघणघणध्वनिः। महादेव महादेव महादेवेत्ययं ध्वनिः॥

6

मुक्त्यङ्गनाकरस्पर्शविवाहपटहध्वनिः। महादेव महादेव महादेवेत्ययं ध्वनिः॥

7

मत्सेवनासमायातजयश्रीदुन्दुभिध्वनिः। महादेव महादेव महादेवेत्ययं ध्वनिः॥

8

पापाटवीप्रविष्टाग्निज्वालाचटचटध्वनिः। महादेव महादेव महादेवेत्ययं ध्वनिः॥

9

महादेवस्य वाग्वल्ली चतुरक्षरपल्लवा। भक्तिसिद्धा भवत्येषा चतुर्वर्गफलप्रदा॥

10

इति श्रीमहादेवाष्टकं सम्पूर्णम्॥