Shri Shailesha Charana Sharana Ashtakam

1

गौरीमनोहर ! सुरासुरमौनिवृन्द संसेविताङ्घ्रियुग ! चन्द्रकलावतंस ! कैलासवास ! करुणाकर ! भक्तबन्धो ! श्रीशैलवास ! चरणं शरणं तवास्मि॥

2

भक्तार्तिहार ! भवबन्धविनाशकेश ! दिव्यापगाकलितकान्तजटाकलाप ! शेषाहिभूष! वृषवाहन ! व्योमकेश ! श्रीशैलवास ! चरणं शरणं तवास्मि॥

3

भृङ्गीशसेवित ! गणेशकुमारतात ! मृत्युञ्जय ! त्रिपुरदानवभेदकारिन् ! पाणावुपात्तमृगडामरुकत्रिशूल ! श्रीशैलवास ! चरणं शरणं तवास्मि॥

4

नागेन्द्रचर्मवसनाग्निरवीन्दुनेत्र ! नारायणीप्रिय ! महेश ! नगेश ! शम्भो ! मौनिप्रियाश्रितमहाफलदोग्ररूप श्रीशैलवास ! चरणं शरणं तवास्मि॥

5

सर्वार्तिभञ्जन ! सदाशिव ! दानवारे ! पार्थप्रहारकलितोत्तममूर्थभाग ! यक्षेशसेवितपदाब्ज ! विभूतिदायिन् ! श्रीशैलवास ! चरणं शरणं तवास्मि॥

6

श्रीभ्रामरीश ! मदनान्तक ! कृत्तिवास ! सर्पास्थिरुण्डकलितामलहारधारिन् ! भूतेश ! खण्डपरशो ! भवबन्धनाश ! श्रीशैलवास ! चरणं शरणं तवास्मि॥

7

सर्वागमस्तुत ! पवित्रचरित्र ! नाथ ! यज्ञप्रिय ! प्रणतदेवगणोत्तमाङ्ग ! कल्पद्रुमप्रसवपूजितदिव्यपाद ! श्रीशैलवास ! चरणं शरणं तवास्मि॥

8

शम्भो ! गिरीश ! हर ! शूलधरान्धकारे ! श्रीशैलवास ! भ्रमराम्बिकया समेत ! श्री पार्वतीदयित ! साक्षिगणाधिपेड्य ! श्रीशैलवास ! चरणं शरणं तवास्मि॥

9

श्रीशैलं, शिखरेश्वरं , गणपतिं, श्रीहाटकेशं पुन स्सारङ्गेश्वर, बिन्दुतीर्थममलं, घण्टार्कसिद्धेश्वरं गङ्गां श्री भ्रमराम्बिकां गिरिसुतामारामवीरेश्वरं शङ्खं चक्रवराहतीर्थकलितं श्रीशैलनाथं भजे॥

10

इति श्रीशैलेशचरणशरणाष्टकं सम्पूर्णम् ।॥